Yo! 歡迎嚟到新一集嘅ManTheFvckUp，喚醒你嘅雄性力量，征服你嘅戀愛世界。
近幾日呢，我發覺自己有少少懶惰，有少少stuck，唔太想繼續做嘢。
好好彩嘅係，我好快catch到自己少少向下沉嘅徵兆，所以我就馬上用番我之前學過嘅嘢，去增加自己工作嘅動力。
你有冇試過發現自己越來越懶，即使你知道有啲嘢需要做，但係自己唔係好想take action去做嘢呢？
今日將會同你分享一條由一位專喺研究人類procrastination，最頂尖嘅科學家Dr. Piers Steel所寫嘅motivation方程式，
協助你令自己變得冇咁懶，唔好再拖延你嘅夢想。
以下就係Dr. Piers同我哋講動力方程式：M = E x V／I x D
意思就係：Motivation = Expectancy 乘 Value，除 Impulsivity 乘 Delay。
喺我哋解釋各項名稱之前，你首先要知道，
如果你想有好大嘅motivation動力，你嘅分子（Expectancy同Value）就要整大啲，但係你嘅分母（Impulsivity同Delay）就要整細啲。
首先，＃1 Expectancy其實意思就係你嘅自信心，
如果你『expect』預期某一件事係有可能發生，並且覺得自己應該都可以做得到，咁樣你就有更大嘅動力。
換句話嚟講，如果你嘅目標太過大，大到連自己都覺得完全冇可能發生，咁樣你就需要首先去簡化一下你嘅目標；
Set返低啲先，等自己做到一個較細嘅目標之後，建立更大自信之後，你再去攻擊下一個level嘅目標。
有野心係絕對好事，你亦都應該長期stay hungry，令自己不斷有更大嘅嘢去追隨；
但係如果目標太過遙遠，對於呢一刻嘅你太過難達到嘅話，你就需要輕微調整返少少，讓自己容易少少成功先，下次『升呢』之後再去打大佬。
＃2 Value就係講緊，其實你心底裏係咪真係好想達到嗰一個目標，你set嘅target係咪真係自己好想要。
呢種就係所謂你有冇一個burning desire，你有冇一種燃燒緊嘅慾望去做到嗰樣嘢，
如果有，你先至會有更大嘅motivation動力去take action。
所以我成日教你，你任何想做到／得到嘅嘢，
你一定要首先搵出你背後嘅原因，搵出你嘅emotional reasons，搵出你嘅WHY。
譬如你依家set咗個目標話『三年內要買到樓』，你都要問清楚自己：
點解我想買到樓先？
點解我一定要買樓先？
其實『買樓買車結婚生仔』呢啲概念係咪真係適合我想要嘅生活先？
我係咪真係想搵到錢就即刻令自己成為20年嘅樓奴？
定係其實我想投資呢筆錢去環遊唔同國家，感受世界有幾大呢？
＃3 Impulsivity就係講緊，當你真係有一種好想要嘅目標之後，你能唔能夠集中精神每一日去實踐最重要嘅事項呢？
定係每一次你大髀feel到電話震，或者聽到最新嘅email alert，又或者接收到一啲好似好得意嘅訊息嘅時候，
你會衝動地去令自己分心，跟住將你最重要嘅工作延期，遲啲先做？
你嘅Impulsivity越高，你越唔能夠自制，你做正經嘢嘅動力將會越低。
所以你必須搵方法去減低甚至完全消除所有嘅distractions，如果你工作時唔能夠好集中地focus，你係冇可能達到你嘅理想位置。
＃4 最後，Delay就係講緊你距離達到目標嘅時刻有幾遙遠，
越係長先至達到目標嘅話，你做嘢嘅動力將會越低。
所以綜合曬以上所講嘅野，有咩方法可以令到自己keep住有motivation做嘢呢？
答案就喺： 你要開始create micro goals，每一日製造一啲微型嘅目標。
你要學識將大型遙遠嘅目標『斬件』，
令你每一日都有一啲微型既target達到，每日都製造一啲small wins『小勝利』，令自己知道每日都係邁向緊正確嘅方向。
咁樣嘅話你就有更大嘅動力去keep fvcking going！
另外，因為你今日打扮得咁靚仔，所以等我畀多個bonus tip你 😉
我哋頭先講咗，Motivation = Expectancy 乘 Value，除 Impulsivity 乘 Delay。
雖然Dr. Piers呢條動力方程式寫得好好，但係我個人覺得motivation需要乘多一樣嘢先至完整，就係你嘅Energy Level！
所以條方程式正確嚟講應該係：
Motivation = ENERGY 乘 (Value 乘 Expectancy / Impulsivity 乘 Delay)
如果你本身成個身體都冇乜能量，
如果你touch wood最近做完手術依家瞓喺醫院度休養生息，
又或者如果你琴日通完頂已經冇瞓30個鐘，
你呢一刻係好難以一個『有動力嘅心態』去睇呢個世界。
所以每一日你優先必須做嘅，
你嘅No.1 Priority一定係首先去『優化』自己嘅energy level，去『叉足電』迎接每一天。
除咗有7－8小時充足睡眠呢啲基本嘢之外，最重要嘅你放咩落你個口度食，
你每日身體有冇足夠嘅旭動，你呼吸平時嘅方式係咪腹式呼吸，又或者你工作範圍係咪充滿著滋擾等等。
如果你真係想增加自己嘅動力，
由今日開始，請你好好認真地調節自己嘅energy，
並且善用以上嘅motivation equation，一步一步邁向『在你遙遠的附近』嘅偉大目標！