Yo! 歡迎嚟到新一集嘅Man The Fvck Up, 協助你創造一個你想要嘅戀愛生活。
今集非常重要, 想同你討論一個好重要嘅問題, 一條關於你自己嘅問題, 一條我之前學溝女都問過我自己嘅問題, 就係:
“你對於你自己需要去學溝女有冇保留呢?
即係話,你介唔介意話畀你啲屋企人, 朋友或者其他人聽, 話你其實喺度學緊一啲誘惑女人嘅技巧,學緊點樣同異性溝通connect, 聽緊一啲dating advice等等呢?”
因為你點樣搭呢條問題, 係會好大咁影響你將來同女人之間有幾成功。
我自己曾經問過好多男人類似嘅問題, 問佢哋覺得佢哋屋企人或者朋友會可能會講啲乜, 如果佢哋知道你學緊一啲dating advice.
咁其實大部分嘅諗法, 都唔係真實所發生嘅事, 佢哋比我大部分嘅回應都係基於佢哋自己憑空想像可能會發生嘅嘢 , 因為佢哋根本就冇同其他人直接講過呢個問題。
所以佢哋所講嘅嘢, 只係佢哋自己嘅story, 只係佢哋base on 恐懼自己同自己喺心裏面講嘅說話。
第二樣嘢就係, 大部分人都係好驚其他人去批判佢哋所做嘅行為, 驚其他人以道德判官嘅身份去judge佢哋。
雖然我哋都知道, 唔應該咁care人哋對我哋自己嘅諗法,但呢樣嘢係對好多男人嚟講都係一個好大嘅心理障礙。
所以點解, 即使我見到越嚟越多人聽Man The Fvck Up, 學完呢啲已經證實咗有效嘅溝女攻略, 佢哋仍然未創造做到佢哋想要嘅戀愛生活…
解釋就係, 如果你對某一件事並唔感到自豪, 你係會嘗試將佢隱藏/埋藏。
例如, 如果你潛意識覺得唔想畀人知道你學緊Dating Advice, 學緊點樣可以識得多啲女仔, 咁你就絕少可能去應用你學咗嘅技巧, 因為你心理上覺得你有需要去將呢件事收埋;
相反, 如果你係覺得學溝女係一件好自豪嘅事 , 知道呢件事係對於你自己同其他人長遠都有好處, 咁你每次學到一啲新嘢, 你就會急不及待, 一有機會就去練習, 去試下呢啲新技能,新技巧work唔work。
所以你要對於你之前所做過嘅嘢, 以前發生嘅嘢, 你而家所做嘅嘢, 你將來想做到嘅嘢…
你要搵一個方法去為呢啲嘢感到自豪, 你先至可以邁向將來理想嘅成功。
咁我打算咁樣做, 我以下會去列出一啲主要原因或者主要藉口, 點解有啲男士會覺得學dating學溝女係有啲內疚, 有啲羞愧感。
但係喺我哋開始之前,
我想先講講, 點解去批判人哋或者去judge自己呢個行為其實係好無謂同埋愚蠢嘅。
因為我哋頭先都講過啦, 我哋每個人都好驚畀人去judge, 所以先至點解搞到我哋會驚畀人知道, 我哋每日喺度學緊點樣溝女。
第一, 無論係正面地或者負面地去批判人哋, 其實都係嘥你自己時間嘅行為。
如果你鍾意佢所做嘅嘢, 咁你咪同佢身上學習, 模仿佢嘅行為囉。
如果你唔鍾意佢所做嘅嘢, 咁你咪唔Q好理佢, 繼續專注番喺你自己身上, 繼續係屬於你自己嘅道路上打拼囉!
第二,
如果將來有人去批判你, 又或者你驚某啲人可能會judge你, 咁我想你記得呢個事實:
就係, 任何負面地批判你嘅人, 其實佢哋都披露咗佢哋自己最深層嘅一面,
佢哋其實係話緊俾你聽:
“佢哋覺得佢哋嘅自我形象,佢哋嘅self-image受到你嘅威脅。
所以佢嘅自然反應, 最容易反擊嘅行動就係去負面的批判你, 希望從中可以利用負面嘅社會壓力, 去防止你繼續勇敢地行你自己揀畀自己嘅一條路。”
所以你明白咗呢一點之後, 你就可以明白任何嘅批判, 任何形式嘅judgement, 根本就係好似放屁咁, 嘗試去虛張聲勢咁嚇走你; 實質對你係零傷害, 根本就冇任何真正嘅意義同實質基礎。
再問心講, 你依家身邊所識嘅人, 有幾多個真真正正擁有佢哋想要嘅關係, 有幾多個嘅戀愛生活係你自己想要嘅?
如果佢哋都冇一啲正面嘅參考價值, 你係咪應該仲聽佢哋喺度豬噏呢?
仲有就係,
如果呢啲你認為重要嘅人, 會因為你嘅誠實, 因為你坦白同佢哋講話你想學習成為一個更加有吸引嘅男人而去批判你, 佢哋三言兩語仲值唔值得你去聽入耳?
請你諗諗今集所講嘅嘢…
我哋下一part正式開始解答一啲主要原因或者主要藉口點解有啲男士, 會覺得學dating學溝女係有啲內疚感。