Yo！我喺MTFU嘅Man神啊。
巴打你依家係咪覺得自己係一個比較內向怕醜嘅人呢？
你出面對人嘅時候係咪通常比較靜冇乜微笑唔多講嘢呢？
你又會唔會覺得呢種『性格』搞到啲女留意唔到你呢？
點樣解決呢個問題就係我哋今日第397集MTFU探討嘅重點，
繼續去協助你成為一個更有力量，更有吸引力，更有影響力嘅現代雄性男人，活出一個更有激情嘅生命！
＃1 首先想講嘅就係：仲有兩集MTFU就會去到第400集，
我喺第400集將會有一個小小surprise送畀大家，
咁所以各位巴打就請你留意幾集之後，小弟係有啲乜嘢宣佈啦！;)
Anyway，今日第一樣嘢想分享畀大家嘅就係：
小弟間唔中就會收到某啲巴打嘅email，大約話我知『由於自己性格比較內向，所以就溝唔到女』類似嘅意思。
正如你都知道：係一個社交social情況裏面，
你嘅內向你嘅沉默好多時喺對事情冇幫助，你係好難純粹靠『等人哋去搵你傾計』咁樣去認識新朋友。
雖然好多人以為只有『外向』嘅人先可以做一個社交領袖，但係呢種只係一個謬誤。
因為好多人都誤解咗『性格外向者／性格內向者』嘅真正意思，
亦都有好多人誤以為『性格』就係定義你嘅『行為』。
＃2 所以第一樣嘢你必須明白嘅就係：
所謂嘅extrovert／外向者，只係講緊一啲透過social／社會交際令自己recharge，更加活躍賺取能量嘅人；
相反所謂嘅introvert／內向者，只係講緊一啲透過『自己一個獨處』令自己recharge賺取能量嘅人，
而佢哋social得耐會感到疲倦，失去能量嘅人。
兩種性格嘅人之間仲有啲咩唔同呢？
＃3 『外向者』係鍾意同一大班人傾計，鍾意多啲朋友，講多啲嘢，
容易接受改變，容易分心被打擾，比較開放，同任何人都好open，好快做決定，
鍾意得到別人注目，唔介意係嘈吵嘅環境下工作，開會嘅時候通常會講多啲嘢嘅人。
相反，『內向者』係鍾意一對一咁樣傾計，
比較享受深入親密但係可能冇咁多嘅朋友關係，比較喜歡聆聽，比較難接受改變，
可以長時間集中，比較保守，只會同少數人打開自己，
通常會思考好耐先至做決定，唔太鐘意得到注目，
鍾意喺靜嘅環境工作，只有人哋問佢先至會分享自己意見嘅人。
＃4 咁雖然你嘅性格並唔係100%內向者或者外向者，好多時我哋都係呢個光譜之中傾向某一邊，
但係你要明白：就算你係比較內向／怕醜／靜，其實你係冇需要改變自己性格先至溝到女！
關鍵喺：你能唔能夠喺重要嘅時刻，展現一啲相對外向嘅行為表現；
亦都即係話，你能唔能夠喺social嘅場合，仍然主動地去表達自己，而唔係收埋自己！
＃5 『內向者』喺social嘅場合，最重要就係要be present，你係100%『在場』。
喺社交場合你係唔應該不斷思考，不斷分析，不斷『諗嘢』；
因為每次你去做thinking嘅時候，你就係入番自己嘅思想念頭之中，你就唔係being present緊。
相反，你係應該去透過你嘅五官感受當時所有嘢：
你睇到啲乜嘢？你摸到啲乜嘢？你聞到啲乜嘢？你聽到啲乜嘢？或者你食嘢飲嘢有咩味道？
最容易的方法去離開你活躍嘅無限思想，就係你要focus返喺你嘅body／身體上感受到啲乜嘢！
＃6 點解being present係溝女嘅必要條件呢？
原因就係，當一條女同你傾計嘅時候，
佢係唔想對住一個『人在心不在，扮曬聽緊但係其實自己喺度諗緊其他嘢』嘅男人！
如果你係有仔細聆聽，停一停先至選擇回應嘅話，
呢一種雄性男人嘅presence，就係99%男仔缺乏非常有吸引力嘅特質！
＃7 去令對方知道你係『存在緊』係有幾種方法。
除咗你認真地係需要仔細聆聽，唔好諗你自己下一句講咩之外；
你可以等待每當對方講完佢嘅說話之後，你重覆返佢最後所講嘅幾個字。
譬如佢同你講話：『我家姐好鍾意去旅行。』
你就可以講話：『去旅行？』
雖然聽落好簡單，但係當你咁講嘅時候，對方好多時都會接住繼續講佢想講嘅故事。
＃8 Anyway，今集唔係教你說話技巧，
如果你想知道點樣同女仔傾計嘅話，請你自己research返我之前幾十段嘅教學。
今日嘅重點就係：
就算你同我Man神一樣，喺一個『需要有獨處時間，比較鍾意靜去賺取能量嘅內向者』嘅話，
呢種嘅性格都唔代表你有藉口話自己溝唔到女！
因為事實就係：『內向者』其實有一種優勢，我哋係好自然地識得集中聆聽對方，令對方感受到被重視；
而好多時『外向者』係唔識得收聲，淨係識得有佢講冇人講。
咁所以只要你喺社交場合停止你嘅思考分析，集中返去透過你五官感受身邊嘅人與事，
你就能夠透過獨有嘅presence，去同唔同嘅女仔F+C，
並且如果對方過到你篩選機制嘅話，你同佢之後連繫。
以上就係每一位內向男士必須認清嘅溝女真相，
鍾意今集嘅話就like並且留言話我知啦， 下集再見你！
喂！多謝咁多位巴打嘅踴躍支持啊，如果你想得到『10個溝女最常遇上嘅難題（…同埋解決方法）』，請你去到manthefvckup.com/freebook 去下載呢本43頁嘅免費書。
想睇埋今集文字blog嘅話，當然可以去manthefvckup.com啦！
同埋最後想睇埋每日update嘅Instagram，可以去IG search manuptoday，下集再見啦！