Yo! 我喺MTFU嘅Man神啊，歡迎嚟到新一集嘅ManTheFvckUp，
協助你成為一個更有力量，更有吸引力，更有影響力嘅現代雄性男人，創造你想要嘅夢想帝國。
＃1 各位巴打，仲有幾日2017年就會完結啦，你捨唔捨得今年呢？
如果你仲未睇我哋『2018年成為真男人七步曲』嘅頭四步嘅話，
請你馬上停止呢段片，返返去睇返之前嗰四集！
＃2 今日就講埋2018年成為真男人嘅第五步，
就係：你必須將自己全新嘅標準／standards，塑造成為你心理上嘅identity，一個屬於你自己嘅新身份。
意思就係：你點樣去定義自己，你點樣去睇自己，你點樣去define自己，
將會係取決你能唔能夠絕對地follow through，完成某樣工程嘅重要因素。
只有你相信自己係『嗰一類會follow through／完成使命嘅人』，
你先至會喺現實絕對地follow through／完成使命。
＃3 譬如可能你同自己講話：
『我一定會好努力去戒煙嘅，但係你都知啦，過去十年我都好努力去戒煙，但係次次都係嗰種中途放棄嘅人，因為你都知道我食煙食咗幾廿年㗎啦，好難解㗎嘛…』
Well，如果你咁快就講一大炸呢啲咁嘅濕鳩藉口，你未開始戒煙就已經輸撚曬啦！
＃4 點解呢？
原因就係：We all behave consistently with who we believe we are，
我哋永遠都會以『自己相信自己係乜嘢人』嘅自己，去作出一系列相應嘅行為。
因為人類心理學其中一個最強嘅力量：
就係我哋會有一種心理需要，去維持一個我哋自己點樣睇自己嘅形象。
當我哋定義自己係某類人嘅時候，我哋就會根據嗰一種嘅『identity』，去作出一系列合符『嗰個身份』 嘅行為表現。
＃5 譬如當你定義自己為一個『怕醜保守嘅人』，
咁樣除非你係飲醉酒或者透過飲酒去解決釋放自己，否則你係好少會發癲或者好social去社交同人傾計。
（Btw，說穿了，其實好多時你都係借助『酒精』去終於容許自己放鬆，容許自己以另一面去面對世界。）
＃6 又例如，好多時巴打都會同我講話：
『Manson，我唔係嗰一種會主動同女仔傾計嘅人喎／
Manson，我唔係嗰一種會摸手摸腳做physical touching嘅人喎／
Manson，我唔係嗰一種first date咁快就會同女人上床嘅人喎。』
Well，如果你咁樣同我講，我就會問番你：
『你又知自己係呢種咁嘅人？幾時開始你係咁樣去定義自己㗎呢？』
＃7 你認真諗下：係幾耐之前你開始決定自己可以做或者唔可以做某啲嘢嘅呢？
係幾耐之前你開始決定自己應該或者唔應該做某啲事情呢？
呢個concept喺幾多年前發生呢？
如果你坦白面對自己今日嘅生命，你就會發現自己好可能係一種廿幾三十年前，
甚至四五十年前當時定下嘅standards／標準或者信念而繼續去活你嘅人生。
＃8 喺你好細個童年嘅時候，當時你係做咗某種決定，認為自己就係某一類人，
並且認為自己有啲乜嘢係可以有能力做得到，有啲乜嘢係冇能力去做。
之後你嗰啲童年嘅信念，慢慢地就會成為一個限制自己潛能嘅頂點，
最後佢哋就會完全地操控你將來所有嘅可能性！
＃9 同樣道理，你知唔知道點解馬戲團嘅大笨象，可以咁輕易地被人類攞條繩就操控佢哋嘅行為呢 ？
按道理，一隻幾噸重兩層樓高嘅大笨象，求其旭一旭就可以摧毀成個馬戲團啦！？
原因就係：因為呢啲大笨象細個幾個月嘅時候，
人類就一早已經將佢哋綁喺一條柱上面，當時嘅小象係點樣掙扎都逃脫唔到。
到佢掙扎到咁上下嘅時候，佢就學識放棄，
並且堅決相信『我永遠都係唔能夠逃脫／我無論點樣掙扎都係冇用』，最後大個咗之後都仍然深深地堅信一點！
＃10 重點就係：人類同大笨象都係一模一樣，
我哋細個嘅時候都係被一系列嘅成年人訓練／適應／condition成為『某一類人』，
最後經過十幾年嘅conditioning，最後我哋就會覺得自己屬於某一類人，
覺得自己可以做到某一類嘢，但係唔可以做到某一樣嘢。
所以當我哋細個嘅時候定義咗自己係一個點樣嘅人之後，
我哋就覺得『我不嬲都係咁樣／某樣嘢就係現實真相／世界就係咁樣運作』等等。
＃11 如果你明白我以上所講嘅嘢嘅話，
我依家就邀請你審視一下你現時生活嘅任何一方面嘅限制／limitation，並請問問你自己：『 究竟我幾時開始決定接受呢種嘅限制呢？』
好多時候，我哋細個之所以會以某一種狀態／以某一種行為表現去adapt去適應，
原因係因為當我哋做『某一個自己嘅時候』，
我哋先至可以被父母長輩或者其他人接受／accepted／認同／approved／尊重／respect／或者鐘意／like。
但係好多時，當時我哋嗰一種嘅狀態去適應，
其實嗰一個並唔係我哋真正真實嘅自己，嗰一種並唔係我哋真正嘅true selves。
＃12 只有每次你透過你隨心／spontaneous／無拘無束自然地flow，你先至可以感受到真正由心出發嘅滿足／fulfillment。
所以無論你依家依附係一個乜嘢嘅身份／乜嘢嘅identity之中，你最後都係會議嗰一種嘅方式去活你嘅人生。
＃13 你要記住嘅真相就係：
我哋未必能夠經常得到我哋想要嘅嘢，但係我哋永遠都會以『自己相信自己係一個乜嘢嘅人』嘅方式去生存。
你嘅identity，你認為自己係乜嘢身份，就會係你舒適範圍嘅底線。
慾望同目標未必可以次次都達到，但係你嘅標準／standards永遠都可以，
你點樣定義自己身份就係你最終會得到嘅人生。
各位巴打又明唔明今集咁deep咁深奧咁深層次嘅價值呢？
鍾意今集嘅話，就畀個like呢段片並且comment話我知啦！
我會視乎大家嘅反應，再睇下幾時推出最後兩集嘅，
喺2017年之內完唔完成到就靠你支持喇！
希望今集幫到你！
